الرئيسية
من طرف الشاعر: محمد بوهارون الزوي*
خذيتي عقلي ما نحساب.. بطيف اعجاب .. ولكن هاب.. دخولك باب .. مدرج كلية الاداب
هلبتي بان عليك شعر .. اطوال حدر .. اشعل بحموره روسه غر
وخد اتقول شفاق قمر .. وبين حجاب.. غميزه راسمها كتاب
وزوق الباس ومشيه حر .. وبيض اكعاب .. وبسمه وتشهليل انياب
وهدب اتقول احراب اتضر.. مغير اسباب.. انجيكم ونقدم ونهاب
هلبتي جيتي راس فوق.. ورمش ايعوق.. ولبسك زايد زولك زوق
من احسن موديلات السوق.. افخر لثياب.. اللي ع الصدر احنن ورطاب
امعاهن جسمك دوب ايتوق.. اثمارك طاب.. دريخه طبتي للقلاب
انتي من يدفع فيك احقوق.. وكتب اكتاب .. كما من حج البيت وتاب
اللي يشوفك بالعين ايروق .. الا اللي جاب.. وحاشك ننقنا جياب
بعد قيرك ف الريق ايذوق.. وحال عذاب .. المولى في حاله استجاب
الا خنجر حبك مرشوق.. الحق لجناب.. ونا قلبي من نظره ذاب
الخصر اللي خاوي معلوق ..برخوا اعصاب .. امغير خراب.. اترجي فيه ومسع راب
هلبتي والساعه ف اليد .. ورمش ايغد .. امضلم ع الماقي الاسود
خلايه لولا ضي الخد.. ايعم ضباب.. طليس اتقول جناح غراب
انتي خدك قابل يوقد.. شعل لهلاب .. كما بارق في غيم سحاب
جميله وصفي ما حودد.. بدون اسباب.. انتي سمحه وانا رجاب
اشهاده ياعون اللي يمد.. لبيتك باب.. ويسمع منك رد اوجاب
هلبتي دورك ماح غزير.. اتقول حرير.. ثناوي طايح فوق ضمير
اللي يحوزك يبقى في خير .. بكل احساب.. انتي ريله فيد الكساب
سريبك يصعب ع التفسير.. امغير اكذاب .. ان قلت نجهلها لي انساب
خذيتيني وانا غفلان .. وخذية بوقه قوم لقوم
قعدت وباعدت الشيطان.. سرابي طيفك كيف النوم
وعيت ونابيدي غرقان.. جرفني شوقك جيت انعوم
انميدخ ما كينا كان.. اجرحت بغيرك حقا يوم
غلاك اسيطر ع الاذهان.. شريط افكاري بك مرسوم
يداعب في بكل الحان.. بزولك ننقني مغروم
اشهاده م الدين والايمان.. انما مافيك ومو متموم
جمال ايهبّل كل انسان.. الا نا منك ضقت اهموم
قتلتيني مافيك حنان .. ظلمتيني ونا مظلوم
بعينك والرمش الفتان .. سقني نكهة كاس اسموم
انغيّب ونروق ونطمان.. ولكن جرحك نازف دوم
غراني زولك وقتن بان.. اللي لايمني كيف ايلوم
هلبتي تمشي في قفطان.. المنقوشات عليه ارسوم
اتخفي من قاري القارن.. الا احنا ناس ارقاق اعزوم
انطيحوا من بوخة دخان .. انتي يابال جمالك عون
بخصك شلتي ع(....)* .. كتاب الكليه امختوم
اغرق في صدرك دوبه بان .. اتزيدي بيه صفاء وعلوم
وهو بين افوافيك اطمان .. عطاه الحي اللي قيوم
بعد صدرك منه ريان .. اضمي فيه انهب نسوم
ودورك حدّر ع المسلان.. الخصر اللي خاوي مقيوم
اشعل بحموره في للوان .. ثناوي منكوش وملموم
ولك زر وصنف السيقان.. وخدك بارق بين اغيوم
الله اللي دارك سبحان.. جميله فوق الناس اعموم
ابمشيه هديتي الكيان.. مشيت علي سطاش كلوم
خذاني حلم اللي سهيان.. مشيت معاك لبر الروم
احلمت ولوينا عرسان.. ومهرك دافع روحي سوم
كسيتك من عالي الاثمان .. من احسن حلي اللي منضوم
ابقيتي قدام الشبات.. اثريه ولخرات انجوم
وزفه مافي هالزمان .. الدنيا تمتلك سلوم
اتحيي فيك معا لمان .. الموقف قدامك مقسوم
على الصفين وبعض احيان .. العالم قدامك ملموم
ايصفقلك ومعلي شان.. ايهللك بالفرحه دوم
وبالعطر اتمّطر لمزان.. جميع نبات الارض يقوم
جميع اللي شافك زهيان.. الا نا تبقي ليا دوم
انبايع للناس وسلطان.. انراجي في الشي المعلوم
دخلت وطلعنا البيان.. شرف للزين اللي معصوم
طلعّت انسلم ع الحبان.. جميع اللي ضاف ومعزوم
وعيت ونا في وسط اجنان.. احلام وماشي في ديموم
ابنظره شديتي وجدان.. معاك وعاودلي مهزوم
القيت مكاني هو المكان.. انثغي تثغاي المفطوم
انلاقنا عند الميدان .. انريد نعديله ملزوم
غبا لوحازنك بيبان .. وصار ارهاب.. بالانسحاب.. اندايش مامدعاك انهاب
خذيتي عقلي مانحساب .. بطيف اعجاب .. ولكن هاب .. دخولك باب.. مدرج كلية الاداب
*كلمة تخدش الحياء
المصدر
شريط مسموع صادر عن شركة الخدمات الاعلامية طرابلس
منقول
